A SENTENZA PODE RECORRERSE

O alcalde de Cerceda, condenado a oito anos de inhabilitación

Redacción 07 agosto 2019 18:34 h.

[Imaxe: Radiocoruña, Cadena Ser] García Liñares

O rexedor de Cerceda, José García Liñares (PSOE), vén de ser condenado polo Xulgado do Penal número 2 da Coruña a oito anos de inhabilitación para desenvolver un emprego ou un cargo público por un delito de prevaricación relacionado coa adxudicación e a contratación dunhas obras.

Oito anos de inhabilitación para emprego ou cargo público. Esta é a condena que vén de ditar o Xulgado do Penal número 2 da Coruña contra o alcalde de Cerceda, José García Liñares, do PSOE. A sentenza, dada a coñecer esta cuarta feira, advirte dun delito de prevaricación en relación á adxudicación e á contratación das lagoas do parque do Acevedo, unhas obras orzadas en 306.858 euros.

O fallo tamén afecta o arquitecto municipal, Antonio J. Varela, ao consideralo “cooperador necesario” e condénao a catro anos de inhabilitación para cargo e emprego público e a nove meses de suspensión no seu posto no Concello por falsidade en certificado.

As obras acometéronse, segundo a sentenza, por unha “orde verbal” do alcalde, a quen se lle acusa de “realizar a toda costa as obras antes das próximas eleccións [as municipais de 2015]”.

O primeiro fallo en relación a este procedemento ditouse en decembro do ano pasado e foi declarado nulo, debido á falta de imparcialidade, por un tribunal da Audiencia Provincial en abril de 2019. O 18 e 19 de xullo tivo lugar o novo xuízo oral.

A sentenza, que nada di do delito de fraude contra a administración que se solicitaba no procedemento –iniciado a raíz dunha denuncia do PP- foi ditada en primeira instancia, co cal, pode recorrerse ante a Audiencia Provincial.

Máis novas

politica
A transferencia da AP-9, nova prioridade en todas as axendas
Despois de dez anos sen reclamar unha soa competencia, o PP apúntase cada vez con máis decisión á demanda da transferencia da AP-9. A suba das peaxes en xaneiro volve colocar na axenda dos grupos a cuestión. Algúns vén unha oportunidade nas negociacións para o Goberno no Estado.
politica
Pedro Puy evita confrontar co PP de Ourense e garante a unidade parlamentar dos populares
Horas antes de que a mobilización veciñal en Verín concretase as accións a seguir en defensa do hospital, no Parlamento o PP rexeitou calquera posibilidade de disenso no partido e garantiu o apoio unánime das súas deputadas e deputados ao feche do paridoiro de Verín.
politica
Gómez-Reino móstrase aberto a sumar Anova e os ex alcaldes das mareas de cara ás eleccións galegas
O secretario xeral de Podemos Galiza, Antón Gómez-Reino, mostrouse aberto a “sumar moita xente” de cara ás eleccións galegas previstas para o outono de 2020. Nunha entrevista para a radio pública, sinalou Anova e os ex alcaldes das mareas de A Coruña, Ferrol e Compostela como valiosos apoios.
politica
Pontón vindica “un novo status político” para Galiza
Unha cadea humana arredor do Museo do Pobo Galego serviu esta sexta feira, 6 de decembro, ao BNG para reivindicar o dereito de autodeterminación dos pobos, na xornada que conmemora o 41º aniversario da Constitución. O de Compostela foi un acto simbólico con numerosos integrantes e simpatizantes, no que a portavoz nacional, Ana Pontón, reivindicou “unha Galiza forte con status de nación e autogoberno real para mellorar a vida das persoas”.