Billy el Niño, policía acusado de torturas, cobra un plus vitalicio na pensión

Billy el Niño, policía acusado de torturas, cobra un plus vitalicio na pensión
Billy el Niño nunha imaxe antiga.
Billy el Niño nunha imaxe antiga.  

O policía acusado de torturador Antonio González Pacheco, Billy el Niño, cobra unha pensión vitalicia aumentada nun 15% debido a unha medalla concedida polo Goberno español en 1977. Billy el Niño foi un dos máis violentos policías franquistas, acusado de malos tratos e torturas a centos de detidos e detidas.
 


Segundo vén de revelar a Asociación para a Recuperación da Memoria Histórica, González Pacheco goza dese suplemento do 15% na pensión despois de que en 1977 lle fose outorgada unha distinción polo daquela ministro da Gobernación Rodolfo Martín Villa. O actual Ministerio de Interior confirmoulle á asociación que ese incremento segue vixente.

 

Billy el Niño chegou a ser condenado aínda durante o franquismo por malos tratos ao xornalista Paco Lobatón. Foi en 1974. O ex deputado socialista navarro José Luis Uriz vinculouno co asasinato en 1969 do estudante Enrique Ruano.

 

En 2013, a xuíza arxentina María Servini ditou orde de busca e captura internacional contra González Pacheco. Acusábao dun delito de torturas contra 13 persoas entre 1971 e 1975. Un ano despois, a Audiencia Nacional española rexeitaba a súa extradición porque, argumentaba o tribunal herdeiro do Tribunal de Orde Pública franquista, eses delitos estaban “ampliamente prescritos”.

 

O que non parece prescribir son as prebendas adquiridas na transición polo axente, número dous do sinistro comisario Roberto Conesa. A Asociación para a Recuperación da Memoria Histórica denuncia que ese plus do 15% débese a “méritos, que non son outros que ter torturado terribelmente centos de homes e mulleres que se opuñan á ditadura franquista”. Esixe a retirada dese incremento a quen foi “unha máquina de torturar, perseguir e aldraxar persoas que loitaban polo regreso das liberdades”.



x