BNG demanda que se faga un inventario de todos os bens espoliados polo franquismo na Galiza

BNG demanda que se faga un inventario de todos os bens espoliados polo franquismo na Galiza

Consideran que o Pazo de Meirás é só “a punta do iceberg dun macro espolio”.


O BNG quer que o Parlamento inste a Xunta a facer un estudo no que se inventarie e documenten todos os “bens roubados polo franquismo na Galiza”, ao considerar que sobran evidencias “do espolio sistemático perpetrado polo ditador no que constitúe un auténtico latrocinio de bens mobles e inmobles públicos e privados”. Luis Bará, portavoz parlamentar en memoria histórica, traslada esta mesma proposta nunha carta ao vicepresidente da Xunta,  Alfonso Rueda.  

“Está amplamente documentado que se apropiaron de maneira irregular e ilícita dunha gran cantidade de bens de propiedade pública ou privada que acabaron formando parte do patrimonio do ditador e dos seus herdeiros e, por tanto, constitúe un caso claro de enriquecemento ilícito e de malversación de fondos públicos”, argumentan as nacionalistas.

Nesta liña, consideran que o Pazo de Meirás “é só a punta do iceberg dun gran macro-espolio do que forman parte tamén a Casa Cornide na Coruña; as estatuas de Isaac e Abraham do Pórtico da Gloria; as pías bautismais do mosteiro de San Xiao de Moraime  en Muxía, o Pazo de Bendaña en Dodro, así como obras de arte, cruceiros, escudos, fontes e outros elementos que foron roubados de numerosos pazos galegos”, enumerou o deputado.

O estudo que demanda o BNG tamén debería incluír para as nacionalistas “toda a rede ou trama de homes de palla de dirixentes políticos e empresariais que colaboraron no espolio e recibiron importantes beneficios e prebendas do ditador. Tamén incluiría “a relación de persoas ou entidades lexitimadas para proceder á recuperación dos bens roubados, dándolle todo o apoio, amparo e asesoramento para que podan realizar eses trámites e esa reclamación pola vía oportuna”.