BNG pide un protocolo e máis medios para as mulleres con endeometriose: 60.000 na Galiza

BNG pide un protocolo e máis medios para as mulleres con endeometriose: 60.000 na Galiza

“Se fosen 60.000 homes a resposta sería outra”, critica a deputada Montse Prado.


A endeometriose é unha doenza incapacitante con gran dor físico e desgaste psicolóxico que afecta a unha de cada dez mulleres en idade fértil, 60.000 na Galiza, 9.000 en estado grave, pero que carece dun protocolo de actuación para a súa detención e tratamento no Sergas, de tal xeito que o sistema tarda unha media de oito anos en diagnosticar esta doenza tras obrigar as afectadas a “peregrinar” por distintas unidades e servizos.

A portavoz de sanidade do BNG, Montse Prado, trasladou esta situación ao Parlamento para reclamar á Xunta que cumpra os acordos aprobado na Cámara en 2015 a petición da asociación QuerEndo-Mulleres, que leva anos reivindicando un protocolo e medios para facilitar o diagnóstico e tratamento desta doenza así como a súa divulgación e  coñecemento entre as mulleres.

A realización dun censo de doentes con endometriose é unha das propostas. A deputada nacionalista lembra que falta poñer en marcha  un Plan de detección precoz, creación de unidades especializadas e multidisciplinares nos hospitais, -a día de hoxe só hai en Vigo, Coruña e Ourense-.

Prado salientou na súa intervención que se trataba dunha “doenza de xénero” e expresou o seu convencemento de que “se en lugar das mulleres afectase a 60.000 homes a vontade política para enfrontar a situación sería moi diferente e non estamos dispostas a aceptar que se nos eduque as mulleres que ter dor é normal”.