PIDE UNHA NOVA CIAF

Bruxelas quer que se faga unha nova investigación técnica sobre Angrois

Bruxelas quer que se faga unha nova investigación técnica sobre Angrois
Imaxe da retirada do comboio [O.RODIL]
Imaxe da retirada do comboio [O.RODIL]  

Aliás, deixa a porta aberta a un posíbel proceso sancionador polo incumprimento da Directiva sobre seguridade ferroviaria que obriga os Estados membros a garantir comisións independentes. 


O informe elaborado pola Axencia de Seguridade Ferroviaria europea supón un bon tirón de orellas para o goberno español e, no concreto, para o Ministerio de Fomento

Para alén de cuestionar a composición da Comisión de Investigación de Accidentes Ferroviarios (CIAF) pon en cuestión que garantise a súa obrigada independencia á hora de pesquisar o acontecido na curva da Grandeira o 24 de xullo de 2013.

Neste senso, a portavoz do BNG en Bruxelas, Ana Miranda, asegura, en declaracións a Sermos Galiza, que a axencia "deixa a porta aberta a iniciar un proceso sancionador" contra o Estado español por incumprir a Directiva 2004/49 sobre Seguridade Ferroviaria. Cuestión sobre a que traballará nos vindeiros meses, avanza. 

A axencia entende que debe reabrirse a CIAF e elaborar un novo informe

Aliás, no propio documento, a axencia entende que debería ser reaberta a comisión de investigación para a elaboración dun outro informe, ora ben, garantindo a independencia do órgao "dada a natureza moi seria do accidente". 

Para a voceira do Bloque, as conclusións europeas son "demoledoras" e "están a darnos a razón" en todas aquelas cuestións que veñen sendo denunciadas pola propia organización frontista mais tamén pola Plataforma de vítimas e familiares. 

En nome do colectivo, o seu presidente, Jesús Domínguez, asegurou estaren "emocionados" polo conseguido após tres anos do accidente no que faleceron 81 persoas e máis dun cento resultaron feridas. Ao igual que o BNG, desde a Plataforma exixen a demisión da ministra de Fomento Ana Pastor, e darán traslado do informe íntegro ao seu avogado no proceso xudicial aberto polo sinistro cuxa fase de instrución volveu ser reaberta por orde da Audiencia Provincial da Coruña