ANUNCIOUNO ESTA MAÑÁ NO DECURSO DO COMITÉ NACIONAL DO PARTIDO

Caballero entrará no Parlamento galego despois das eleccións municipais

Caballero entrará no Parlamento galego despois das eleccións municipais
Caballero, co portavoz parlamentar do PSdeG
Caballero, co portavoz parlamentar do PSdeG  

O secretario xeral do PSdeG, Gonzalo Caballero, vén de anunciar que pasará a formar parte do Parlamento de Galiza despois das eleccións municipais do vindeiro 26 de maio. "Quero dicirvos que a previsión que ten o secretario xeral, pois é un tema recorrente nos comités nacionais, é que despois das eleccións municipais entrará no Parlamento galego para defender as posicións do PSdeG", dixo no decurso no Comité Nacional que o partido celebrou esta mañá en Compostela. 

Cómpre lembrar que o líder do PSdeG concorreu de número cinco na lista de Pontevedra nos comicios celebrados no outono de 2016. Nesas eleccións, o PSdeG obtivo catro escanos nesa provincia, ficando Caballero ás portas de entrar no Hórreo. O secretario xeral dos socialistas galegos non desvendou quen será o compañeiro ou compañeira que renuncie para poder facerse efectiva a súa entrada na Cámara. 

Gonzalo Caballero xa sinalara a finais do ano pasado que era "previsíbel" a súa entrada no Parlamento galego, mais naquela altura non fixara ningún horizonta temporal aducindo non ser o "momento oportuno". Con todo, Caballero ten sido proclamado xa candidato do PSdeG á presidencia da Xunta nas vindeiras eleccións galegas.