CRISE EN C'S

Ciudadanos asegura que “non hai máis dramas” mentres continúan as baixas na Galiza

Ciudadanos asegura que “non hai máis dramas” mentres continúan as baixas na Galiza
Beatriz Pino en rolda de prensa [Imaxe: Ciudadanos]
Beatriz Pino en rolda de prensa [Imaxe: Ciudadanos]  

“Non hai máis dramas", sentenciou a deputada de Ciudadanos por Pontevedra, Beatriz Pino, ao ser preguntada pola demisión da ex secretaria de programas do partido na Galiza. A crise no partido laranxa non dá tregua. Martín Amaro, da xunta directiva de Ourense destituída esta semana, anunciou que haberá máis saídas en todo o país debido á "actitude ditatorial e pouco democrática" do actual secretario de organización.


A noutrora fichaxe estrela de Albert Rivera para o seu partido na Galiza, Ángeles Fernández-Ramil, ex asesora da anterior presidenta chilena Michel Bachelet, anunciou a súa demisión como secretaria de programas de Ciudadanos na Galiza e a baixa deste partido.

Fernández-Ramil situou os motivos da súa demisión nos mesmos que esgrimiu o ex líder da formación Toni Roldán a semana pasada cando anunciou a súa baixa, é dicir, amosouse contraria á negativa reiterada de Ciudadanos a facilitar a investidura de Pedro Sánchez. Fernández-Ramil ao igual que Roldán, defenden que Sánchez poida acadar a presidencia grazas a C’s e así non ter que depender o goberno central de acordos puntuais e concretos coas forzas nacionalistas.

"Non se adecuaba aos ritmos que necesita agora o partido" aseverou Pino de quen fora unha das máximas fichaxes que o partido enxalzou na Galiza.

Mais a demisión de Fernández-Ramil foi cualificada desde Ciudadanos como “unha dimisión forzosa”. Así o dixo a deputada pola circunscrición de Pontevedra no Congreso dos Deputados, Beatriz Pino, quen asegurou ademais que a súa saída debeuse á súa falta de ritmo de traballo. "Non se adecuaba aos ritmos que necesita agora o partido" aseverou de quen fora unha das máximas fichaxes que o partido enxalzou na Galiza.

Ángeles Fernández-Ramil levaba á fronte da área programática desde 2018 e viviu entre a Galiza, Venezuela, España e Chile. Neste último país residiu 32 anos e nel desenvolveu a súa carreira como analista política, participando en múltiples debates públicos e foi a primeira muller presidenta da Asociación Chilena de Ciencia Política e traballou na Secretaría Xeral da Presidencia durante o goberno de Michelle Bachelet.

A súa fichaxe polo partido laranxa foi posta en voga como unha grande oportunidade para precisamente “cazar talento”

A súa fichaxe polo partido laranxa foi posta en voga como unha grande oportunidade para precisamente “cazar talento” para o crecemento da formación na Galiza con xente salientada en diversos ámbitos do pensamento, a innovación e o desenvolvemento.

Para a deputada Beatriz Pino o departamento de Programas é "vital" na estrutura de calquera “autonomía”, xa que é o "punto de partida", polo que require duns "ritmos de traballo" que quizais até o de agora "non se podían estar a dar". "Non hai máis dramas", sentenciou.

Olga Louzao abandonou a portavocía esta semana

Aínda que a concelleira en Lugo de Ciudadanos, Olga Louzao, asegurou a Sermos Galiza que a súa decisión de abandonar a portavocía do partido debíase a un desexo de querer centrarse no seu traballo político como edila en Lugo, o certo é que a súa renuncia produciuse no mesmo día, cuarta feira 3 de xullo, en que a cúpula do partido de Madrid e de Galiza destituíu a executiva provincial de Ourense.

A ese respecto, a deputada Pino avanzou en declaracións aos medios que o secretario de organización do partido, Laureano Bermejo, anunciará nos vindeiros días quen é a persoa que ocupe o cargo de Louzao.

En referencia á edila lucense, Pino asegurou que "testa acumulación de papeis políticos e persoais facíase complicado en ocasións e así nolo fixo saber a propia Olga", insistiu Pino, quen sinalou que desde Ciudadanos "non hai máis que palabras de agradecemento" polo seu labor e que "seguirán contando con ela" en Lugo.

A dirección destituída en Ourense reclama a expulsión de Bermejo por “actitude ditatorial”

Após a destitución da xunta directiva de Ciudadanos en Ourense por "discrepancias" coa dirección e "abandono de funcións", Pino asegurou que se debeu a unha "petición directa" dos propios afiliados ourensáns que "fixeron aflorar" a "falta de traballo" e o seu "descontento".

Esixen que se abra un expediente disciplinario e de expulsión a Bermejo por abuso de poder

Esta sexta feira 5 de xullo, un dos membros destituídos, Ignacio Martín Amaro, anunciou a súa baixa e asegurou que se producirán máis polo "malestar existente" tanto en Ourense, como en Vigo, Pontevedra, A Coruña e Lugo, debido á "actitude ditatorial e pouco democrática" de Laureano Bermejo.

Neste sentido, anunciou que a Xunta Directiva destituída "inxustamente" decidiu presentar un "recurso de amparo" ante o Comité de Garantías e Valores de Ciudadanos solicitando "non só a anulación da disolución da Xunta Directiva, senón tamén que se lle abra un expediente disciplinario e de expulsión a Bermejo por abuso de poder, actuación antidemocrática e dano contra a honra dos seus compañeiros de partido".