AUSÉNTANSE DO MÁXIMO ÓRGANO DE DIRECCIÓN

Os críticos de En Marea non recoñecerán os resultados sen unha “auditoría independente”

Os críticos de En Marea non recoñecerán os resultados sen unha “auditoría independente”
Candidatura Entre Todas de En Marea. Foto: cedida.
Candidatura Entre Todas de En Marea. Foto: cedida.  

A candidatura crítica de En Marea, derrotada nas eleccións internas ao Consello das Mareas a pasada fin de semana, non participará este sábado na constitución do órgano de dirección. Tampouco recoñecerá os resultados “mentres non se realice unha auditoría independente dos mesmos”.
 


“Entendemos que dende a suspensión do proceso electoral se impuxo un auténtico estado de excepción en que se violentaron os acordos do Plenario do 27 e outubro”, sinala a candidatura Entre Todas, liderada por David Bruzos, “e houbo unha suspensión de dereitos fundamentais en En Marea”. Malia estas consideracións, os críticos -agás Esquerda Unida, que se descolgou por entender que non habñia garantías de limpeza no proceso- chamaron maioritariamente á participación nas votacións que finalmente foron a fin de semana previa á Noiteboa.

Venceu a candidatura oficialista, encabezada polo portavoz Luís Villares e apoiada por pequenas mareas municipais, o grupo Cerna -procedente dunha escisión de Anova- e unha parte de Anova, ademais de por cargos como a deputada no Congreso Alexandra Fernández ou a europarlamentaria Lidia Senra.

Os críticos, pola súa banda, axuntaron Podemos, a maior parte de Anova, Esquerda Unida ou Compostela Aberta, Marea Atlántica da Coruña e Ferrol en Común. Son estes os que este sábado remitiron un comunicado en que afirman que descoñecen “as auditorías realizadas sobre o censo que serviron de coartada para modificar o calendario electoral aprobado no Plenario”. “Con ese movemento de dubidosa limpeza democrática modificouse a composición do comité electoral e mudou a empresa encargada do proceso electoral e a auditoría dos resultados”, sinala.

Entre Todas considera “máis necesario ca nunca” un exercicio de transparencia “para que as inscritas poidan coñecer que se fixo” e acusa a Coordinadora en funcións de actuar “para beneficiar a candidatura encabezada por Luís Villares”.

O comunicado dos críticos, publicado ao mesmo tempo que o Consello das Mareas iniciaba a súa constitución sen a súa presenza -correspóndenlles 14 dos 35 postos-, remata advertindo que, mentres non haxa auditoría independente, “non lexitimarán unha farsa cargada de malas prácticas e comportamentos nada democráticos que van en contra dos principios fundamentais de En Marea”.