FUGAS NO PP

O ex popular Diz Guedes preséntase con Cs á alcaldía de Tui

O ex popular Diz Guedes preséntase con Cs á alcaldía de Tui
Juan Miguel Diz Guedes con Manuel Fraga
Juan Miguel Diz Guedes con Manuel Fraga  CRTVG

Un dos brazos máis fortes dos gobernos de Fraga, Juan Miguel Diz Guedes, anunciou a súa candidatura á alcaldía de Tui por Ciudadanos. O histórico militante do PP, que chegou a ser conselleiro tres veces con Manuel Fraga así como delegado do Goberno en Galiza, rivalizará agora co PP nas locais de maio.


Quen fora unha dos pesos máis importantes da Xunta de Galiza durante os mandatos de Manuel Fraga, o ex conselleiro Juan Miguel Diz Guedes, vén de presentar a súa candidatura á alcaldía de Tui baixo o cuño de Ciudadanos.

Após facer pública a súa marcha do Partido Popular a comezos de ano e entrever que contaba con máis de medio millar de apoios para presentarse á alcaldía, non formalizou até o de agora a súa candidatura, ofrecendo segundo afirmou “un proxecto en positivo". Afirmou que ten man tendida á “participación e o diálogo", xa que valorou que a poboación "atravesa un momento delicado desde o punto de vista económico e social" para o que apunta necesario recuperar a “convivencia”.

Após facer pública a súa marcha do Partido Popular a comezos de ano e entrever que contaba con máis de medio millar de apoios para presentarse á alcaldía

Juan Miguel Diz Guedes xa ocupou a alcaldía de Tui polo PP desde o ano 1987 ao 1990, logo foi conselleiro durante tres lexislaturas con Fraga, poñéndose á fronte de Xustiza e Interior, de Relacións Institucionais e de Agricultura. Tamén foi delegado do goberno en Galiza do 1996 ao 2000.

Pese a que anunciou a comezos de ano o seu paso a Cs, o certo é que Diz Guedes xa se apartara da primeira liña do PP desde a chegada de Feixoo. Agora, asegura estar disposto a dar a batalla na carreira electoral porque “despois dun mandato con moita crispación e enfrontamento, e que xerou enorme tensión política no concello, hai unha preocupación nos cidadáns", afirmou e prometeu á veciñanza “ devolvela á normalidade”.

 Destas premisas asegurou que sae o lema da campaña que enuncia un 'Tui en positivo'

Destas premisas asegurou que sae o lema da campaña que enuncia un 'Tui en positivo', que ao seu criterio avanza o sentido de todas as políticas que quere desenvolver e anunciou tamén que a súa candidatura conxugará renovación e experiencia.