AFÁSTASE A PERSPECTIVA DUNHA LISTA DE CONSENSO

Feixóo ten 15 días de prazo para apresentar a súa candidatura

Feixóo ten 15 días de prazo para apresentar a súa candidatura
Feixóo, nun acto com Raxoi no Castelo de Soutomaior
Feixóo, nun acto com Raxoi no Castelo de Soutomaior  

Xa hai data para o congreso extraordinario do partido que elixirá o novo rosto da dereita española, o relevo de Mariano Raxoi ao fronte da formación política con máis escanos no Congreso e que goberna con maioría absoluta na Galiza. Serán os días 20 e 21 de xullo. Así o decidiu esta segunda feira a Xunta Directiva Nacional do partido conservador. Ábrese agora un prazo de 15 días para se postularen as persoas que aspiren ao trono que Raxoi deixa vacante.


Feixóo ten 15 días por diante para formular a súa candidatura a suceder Raxoi como presidente do PP estatal. Todo indica que dará o paso, a pesar de que, conforme pasan as horas, se vai esvaecendo a hipótese de que poda encabezar unha lista de consenso.

 

Todos os ollos están postos en Feixóo, mais tamén en Soraya Sáenz de Santamaría e María Dolores de Cospedal, eternas inimigas que poderían librar o seu último combate interno. Non son as únicas apostas. Hai sectores do partido que ollan tamén para o ex ministro de Fomento e ex alcalde de Santander, Íñigo de la Serna, e tamén os hai -aínda que en aparencia residuais- que especulan coas opcións do ex ministro de Exteriores José María Margallo, un dos políticos conservadores que adoitan voar pola súa conta.

 

Feixóo, Soraya, de la Serna e até Margallo fan parte da mesma corrente política dentro do PP, a conservadora. Ningún deles forzaría un debate ideolóxico de fondo para reposicionar o partido. Mais quen si está disposto a o facer é o sector liberal da formación, aquel quen en tempos liderara a ex presidenta da comunidade autónoma de Madrid, Esperanza Aguirre. Partidario de submeter a crítica a doutrina marianista, e moi preocupados polo ascenso de Cs, o segmento liberal tería como hipotético candidato o ex presidente da comunidade autónoma de Baleares, José Ramón Bouzá.

 



x