Galiza Nova chama a mocidade galega a mobilizarse nas eleccións estatais

Galiza Nova chama a mocidade galega a mobilizarse nas eleccións estatais
Imaxe da campaña de Galiza Nova nas redes sociais.
Imaxe da campaña de Galiza Nova nas redes sociais.  
A organización xuvenil desenvolve unha campaña de activación do voto máis novo para os comicios do vindeiro domingo en apoio o BNG.

Galiza Nova chama ao voto da mocidade galega para as vindeiras eleccións do 10-N e o respaldo ao BNG como única voz galega. A campaña estase a desenvolver nas rúas de toda Galiza e nas redes sociais da organización xuvenil co obxectivo de "dar peso político a Galiza nas cortes do Estado". Lingua, medioambiente, dereitos, feminismo: son algunhas das propostas que levan na súa campaña, apoiando o voto ao BNG nestas eleccións. 

A situación de inestabilidade política provocou descontento e desmobilización nas xeracións máis novas que teñen dereito a voto para as vindeiras eleccións do 10 de novembro, indica a organización, que neste contexto pensa que a mocidade perde incentivos para participar activamente exercendo o seu dereito a voto. "Precisamos que a mocidade galega teña unha voz propia no Congreso dos Deputados. Unha voz que sexa capaz de levar os nosos problemas e reivindicar un futuro na nosa terra" explicou o secretario Xeral da organización xuvenil, Paulo Riós. "A mocidade galega enfronta unha situación de emerxencia social, cun desemprego xuvenil dos máis altos do Estado e cunhas condicións de precariedade e temporalidade nunca vistas para as mozas" sinalou o secretario Xeral.

Asemade, Paulo Riós, explicou que "temos que defender o noso futuro e o noso presente, por iso é polo que neste 10 de novembro a mocidade ten que votar ao BNG. Precisamos que se defendan os nosos problemas específicos tal e como ocorre noutros territorios do Estado que, mediante forzas propias, son quen de condicionar aos gobernos estatais e de conseguir melloras para a sociedade".