Gonzalo Caballero anuncia que se incorporará ao Parlamento antes do verán

Gonzalo Caballero anuncia que se incorporará ao Parlamento antes do verán
Gonzalo Caballero atende os medios nos corredores do Parlamento galego
Gonzalo Caballero atende os medios nos corredores do Parlamento galego  Foto: Laura R. Cuba

14 meses despois de asumir a secretaría xeral do PSdeG, Gonzalo Caballero está a pensar xa seriamente en aterrar no Pazo do Hórreo. Tanto que xa lle pon data: será antes do verán. Así o anunciou este domingo.


Nada máis ser eleito ser secretario xeral varios parlamentares dirixíronse a Caballero para lles trasladar a súa disposición a demitir para que el puidese acceder á cámara. Así o relatou o líder do PSdeG este domingo nunha entrevista en Radio Galicia, a emisora compostelá da SER. Caballero preferiu non aceptar esa oferta de inmediato porque, explicou, quería demostrar que se podía liderar o partido desde a normalidade de manter viva a súa actividade profisional, neste caso a docencia universitaria. Transcorrido máis dun ano, agora estaríase achegando o momento en que si valora incorporarse ao Pazo do Hórreo.

"Sen poder dar unha data precisa, si lle podo confirmar [dixo Gonzalo Caballero á xornalista Aida Pena] que probabelmente de aquí ao verán o secretario xeral do partido será deputado autonómico e a intención é que presida o grupo parlamentar".

Sobre o seu primeiro reto electoral como líder do PSdeG, as municipais de maio, Caballero deixou ver a súa vontade de acordar gobernos co resto de axentes progresistas. "Somos unha alternativa fronte á dereita, unha alternativa coa que se pode falar e desde logo temos a posibilidade de estabelecer con todo o arco parlamentar posíbeis acordos puntuais en proxectos de país, dialogar, acordar e consensuar con espírito de convivencia", dixo.