XAVIER ALCALÁ, CANDIDATO DE COMPROMISO

"Hai que facer empresa, non se pode estar con lamentos de xente que nunca saíu do mundo funcionarial"

"Hai que facer empresa, non se pode estar con lamentos de xente que nunca saíu do mundo funcionarial"
Xavier Alcalá
Xavier Alcalá  Foto: XavierAlcala.Com

"Hai que recuperar a esencia do galeguismo", afirma o escritor que dá por vez primeira o paso de integrar a candidatura dun partido político.


Xavier Alcalá, autor do clásico A nosa cinza, fechará a candidatura de Compromiso por A Coruña, informou esta segunda feira a formación galeguista a meio dun comunicado de imprensa.

Alcalá -de acordo coas declaracións recollidas no comunicado- afirma que “o país está falto de galeguismo transversal” e nese sentido enfatiza que a candidatura que lidera Xoán Carlos Bascuas é a ferramenta precisa "para recuperar a esencia dun galeguismo, no que colla moita xente que pon por riba de todo a conciencia de nación e de actuación en todos os ámbitos”.

A xuízo do escritor, Galiza está especialmente necesitada do que dá en cualificar como "galeguismo activo empresarial no sentido amplo da palabra" e a ese respeito expresa a súa confianza nas potencialidades do país: "Hai que inventar, producir, facer empresa, abrirse ao mundo e non se pode estar eternamente con olladas e lamentos de xente que nunca saíu do mundo funcionarial”.