Un dos imputados por atrasar fármacos da hepatite C, novo xerente do Sergas en Ourense

Un dos imputados por atrasar fármacos da hepatite C, novo xerente do Sergas en Ourense
Un dos protestos contra os recortes na administración de medicamentos para a hepatite C.
Un dos protestos contra os recortes na administración de medicamentos para a hepatite C.  

Félix Ruibal, quen fora director de Asistencia Sanitaria e unha das persoas imputadas por homicidio imprudente por atrasar fármacos da hepatite C “con razóns orzamentarias” a seis pacientes que faleceron, é nomeado xerente do Sergas en Ourense.


O até o de agora xerente da Estrutura Organizativa de Xestión Integrada (EOXI) de Vigo, Félix Ruibal, pasará a ocupar o mesmo cargo en Ourense. Unha mudanza que espertou na mañá da sexta feira o malestar do grupo parlamentar de En Marea, posto que o ex director de Asistencia Sanitaria fora un dos imputados por homicidio imprudente por atrasar fármacos da hepatite C “con razóns orzamentarias” a seis pacientes que faleceron.

“A consellaría debe dar explicacións ante o traslado do xerente imputado da área de Vigo á área de Ourense”, sinala Eva Solla nun comunicado de imprensa no que apunta que Ruibal “debería ter dimitido hai tempo”. O grupo parlamentar de En Marea lembra que denegou medicamentos a enfermos de hepatite c e que “foi absolutamente incapaz de ter o mínimo diálogo cos profesionais sanitarios”.

"Lonxe de solventar problemas, Ruibal xerou moitas dificultades nunha área sanitaria coma a de Vigo, que é a que sofre a peor precariedade laboral do persoal sanitario e as maiores listas de agarda de todo o conxunto do Servizo Galego de Saúde", engade Solla.

O Sergas anunciou que Julio García Comesaña, até o de agora xerente en Ourense, ocupará o mesmo cargo na EOXI de Vigo.