As perrenchas de Xosé Carlos Caneiro contra as redes sociais

As perrenchas de Xosé Carlos Caneiro contra as redes sociais

Insubornábel na súa condición de espía independente, Cosme Torreiro achou un claro caso de columnista do réxime, feijoniano, claro, e contrario ao que maioritariamente flúe nas redes sociais, of course.



Outro claro caso de rancor. Porque as súas ansias de protagonismo nunca son correspondidas. E iso non o atura. Nin o perdoa. A súa ilusión era ser o equivalente galego a Sostres ou Losantos, a voz mediática da dereita, querida e odiada a partes iguais, creadora constante de balbordo, mais para a súa desgraza, é un monicreque ao que case ninguén fai caso. E totalmente descoñecido para o gran público, o que tampouco perdoa. Por iso quéixase e insulta, a ver se así.

Sabido é que as redes sociais poden estar cheas de frases odiosas, onde as de carácter españolista e/ou fascista son masivas -aínda que estas non parecen importarlle ao goberno- e resulta que ao noso Xosé Carlos Caneiro -que era a quen antes nos referiamos, a este columnista-oficialista en La Voz e adulador supremo de Feijóo- o que lle gustaría é que esas redes tamén falasen del, dos seus escritos, que o insultaran ou lle aplaudiran, pero que pasara algo. Mais non pasa nada. Os seus pedantes artigos non lle interesan a ninguén. E enfádase. E carga contra todo, coa carraxa de ter fracasado no intento de que todo cargue contra el.

Os seus pedantes artigos non lle interesan a ninguén. E enfádase

Nun último intento desesperado por buscar protagonismo, Caneiro ataca ás redes sociais, á súa peor versión que el xa localizou e filtrou, sabe quen son, un a un. Nun lapsus freudiano, chama “vencedores” aos que máis ruído fan nas redes, para logo desenmascaralos, heroico, ridículo: “Os vencedores nas redes sociais son os que perden nas urnas”. “Sectarios e intransixentes”, cualifica despois aos que el xa sabe quen son, porque ás moitas calidades de Caneiro engádese a da profecía. E anuncia novas perrenchas “o domingo, cando volva gañar o Partido Popular”. Ou sexa, o peor de internet son todo o que non é PP. E nin dicindo esas parvadas lle fan caso nas redes. Pobre Caneiro.