Un Plan de Reactivación Industrial nuclea as propostas do Grupo Común da Esquerda

Un Plan de Reactivación Industrial nuclea as propostas do Grupo Común da Esquerda
Luca Chao, portavoz do Grupo Comúnda Esquerda, durante a presentación das propostas de resolución para o Denate do Estado da Nación. Foto: Grupo Común da Esquerda.
Luca Chao, portavoz do Grupo Comúnda Esquerda, durante a presentación das propostas de resolución para o Denate do Estado da Nación. Foto: Grupo Común da Esquerda.  
Poñer “freo ao devalo da actividade industrial na Galiza” e “a aposta polo I+D+i” conforman o núcleo das 40 propostas de resolución do Grupo Común da Esquerda, que tamén inclúen unha “nova estratexia para o emprego”. Presentounas esta quinta feira a portavoz Luca Chao e debateranse o 27 de setembro na segunda sesión do Debate sobre o Estado da Nación.

“Cómpre contar cos axentes sociais para unha nova estratexia”, engadiu, “que permita aumentar o emprego, reducir a temporalidade, combater as fraudes no mercado de traballo -coma a dos falsos autónomos, mellorar os salarios reais e rematar coa fenda salarial”. O Grupo Común da Esquerda, antes En Marea e agora dez deputadas despois de que catro marchasen ao Grupo Mixto baixo o mando de Luís Villares, centrou así as súas iniciativas no económico.

O mencionado Plan de Reactivación Industrial quere ademais servir como “importante base para o retorno da mocidade galega emigrada” e para iso apóiase no desenvolvemento da investigación, para a que solicitan “a duplicación de recursos autonómicos”.

Máis alá da economía, Chao esixe da Xunta que “atenda ás reivindicacións contra a manipulación das traballadoras e traballadores dos medios públicos de comunicación”. E o crecemento do investimento orzamentario en educación. Neste último ámbito, a portavoz do Grupo Común da Esquerda concretou: “Debe incrementarse até o 5% do PIB en 2022 e avanzar cara ao 7%”. Tamén quere que os colexios concertados se convertan en públicos “mediante acordos cos centros”.

Sobre sanidade, limitouse a expresar que a súa formación demanda “o mesmo que as Enfermeiras en Loita, as pediatras, as xefas de servizo, o persoal de ambulancia, os propios pacientes: que se paralicen as privatizacións en curso e se recuperen os servizos xa privatizados”.

Entre as demais resolucións están que o Parlamento de Galiza se posicione en contra da Lei Mordaza, medidas para a transición ecolóxico, a defensa da lingua e a cultura galegas, unha reformulación do modelo de financiamento que conceda maior autonomía a Galiza ou a concesión da AP9.