ELECCIÓNS MUNICIPAIS

O PSdeG elixe as candidatas e candidatos da Coruña, Ferrol e Ourense

O PSdeG elixe as candidatas e candidatos da Coruña, Ferrol e Ourense
[Imaxe: PsdeG] Gonzalo Caballero, secretario xeral do PSdeG, nunha visita recente a Ourense.
[Imaxe: PsdeG] Gonzalo Caballero, secretario xeral do PSdeG, nunha visita recente a Ourense.  

A militancia do PSdeG vota este domingo as candidatas e candidatos ás alcaldías dos concellos de máis de 20.000 habitantes. A ollada está posta na Coruña –con catro aspirantes–, Ferrol e Ourense –con dous cada unha–.


É xornada electoral no PSdeG. A militancia socialdemócrata elixe este domingo as e os cabezas de lista nos municipios de máis de 20.000 habitantes.

Todos os focos están centrados na Coruña, onde se presentaron catro aspirantes que reuniron o máximo número de avais permitidos, un total de 54. Mídense nestas eleccións primarias José Manuel García, o actual portavoz municipal e persoa de confianza da ex secretaria local Mar Barcón; a avogada Inés Rey; o avogado Rafael Arangüena, que é vicesecretario de Relacións Institucionais do PSOE coruñés, e Juan Ignacio Borrego, ex vicesecretario e ex portavoz do PSOE coruñés.

En Ferrol, un acordo de última hora entre o senador Ángel Mato e Antonio Golpe provocou que de tres aspirantes fiquen dous, o propio Mato e Germán Costoya, concelleiro.

Ourense contaba inicialmente con cinco aspirantes que se reduciron a dous: o actual portavoz municipal José Ángel Vázquez e a profesora Elena de Prada, que sumou á súa candidatura outro dos precandidatos, Antón Alonso.

En Compostela só se presentou o ex alcalde Xosé Sánchez Bugallo logo dun acordo entre distintos sectores do partido, mentres que en Pontevedra fixo o propio o actual portavoz local, Agustín Fernández. En Lugo e Vigo repetirán como candidatos a actual alcaldesa, Lara Méndez, e o seu homólogo vigués Abel Caballero.