Somos Cambados denuncia que a sede do PP está a nome do contrabandista Terito

Somos Cambados denuncia que a sede do PP está a nome do contrabandista Terito
A sede do PP en Cambados. Foto: cedida.
A sede do PP en Cambados. Foto: cedida.  

Vicente Otero Pérez, Terito, foi un dos máis célebres contrabandistas do Salnés. Buscado na Operación Nécora, baixo o seu mando despuntou a xeración de estraperlistas que máis adiante darían o salto ao tráfico de drogas. Militante de Alianza Popular, morto aos 76 anos en 1995, a sede do PP de Cambados segue aínda ao seu nome.
 


Así o denunciou a formación política Somos Cambados, da órbita de En Marea, nun comunicado de prensa. “Entre os propietarios do inmoble no que ten a sede local o actual Partido Popular de Cambados desde hai máis de 30 anos figura Vicente Otero Pérez, alias Terito”, afirma.

O partido de esquerdas engade o texto do Rexistro da Propiedade da localidade do Salnés “que calquera pode consultar”: “Vicente Otero Pérez, en pleno dominio y de carácter privativo. Título: adquirida por título de compraventa en virtud de Escritura pública, autorizada por el notario de Cambados, el día 29 de abril de 1981”.

Somos Cambados responde así ás acusacións do PP local contra a alcaldesa Fátima Abal, do Partido Socialista, á que vinculan cunha sociedade mercantil dun familiar. Somos Cambados fai parte do goberno local. “O PP de Cambados está a demostrar que non lle importan nada nin a imaxe nin os veciños nin o nome da vila”, indica, “mais se o PP de Luis Aragunde pensa seguir con estas políticas e acusacións, por coherencia, igual víñalles ben valorar un cambio de sede”.



x