VENRES NEGROS
Defende a Galega recolle o premio José Couso
A.M.
03 Maio 2019 20:47 h.
![Entrega de premios José Couso 2019 [Imaxe: @DefendeAGalega]](/media/sermosgaliza/images/2019/05/03/2019050320500577071.jpg "Entrega de premios José Couso 2019 [Imaxe: @DefendeAGalega]")
O Teatro Jofre de Ferrol acolleu a entrega de galardóns da XV edición do Premio José Couso, que recoñece a loita de Defende a Galega e a acción impulsada desde hai un ano por este colectivo, os Venres Negros, en que as e os profesionais visten de escuro como símbolo de loito polo control político sobre a CRTVG.
![Entrega de premios José Couso 2019 [Imaxe: @DefendeAGalega]](/media/sermosgaliza/images/2019/05/03//2019050320461960660.jpg)
Tati Moyano e Carlos Jiménez, profesionais da comunicación na CRTVG que participan dos Venres Negros, recolleron o premio agradecendo a nova oportunidade de proxectar as súas reivindicacións “para que cheguen a un maior número de galegas e galegos, que son as e os propietarios da Radio Galega e da Televisión de Galiza”, afirmaron. Ao tempo, tamén chamaron a atención sobre a manipulación informativa, o desmantelamento do medio público e “as dificultades crecentes para desenvolver o traballo con criterios profesionais”.
Chamaron a atención sobre a manipulación informativa e o desmantelamento do medio público
Ambos reafirmaron a necesidade que ten a sociedade galega de contar cuns medios públicos “libres de inxerencias do poder” para unha convivencia máis rica, máis crítica e máis vizosa.
Animaron tamén as compañeiras e compañeiros “con cargos de responsabilidade, a maioría profesionais con criterio e experiencia” a que sexan quen de “esquivar as presións, de plantarse se cadra ante os intentos de manipulación e de aplicar criterios exclusivamente xornalísticos e de servizo público no tratamento cotiá da información”.
Moyano salientou durante a intervención que a reivindicación principal de Defende a Galega non é outra que o cumprimento da Lei de Medios aprobada polo Parlamento hai case oito anos e que inclúe medidas como a creación dun Consello de Informativos que vele pola independencia, veracidade e obxectividade dos contidos. Do mesmo xeito, reclamou un Estatuto profesional e un Consello de Informativos na Radio e na Televisión de Galiza.
Reafirmaron a necesidade que ten a sociedade galega de contar cuns medios públicos
Na recollida do premio, Moyano e Jiménez dedicaron unhas palabras de agradecemento “á profesionalidade doutros medios, a maioría dixitais, que informaron cabalmente das nosas protestas, soportando nalgúns casos, ameazas e presións”.
Concluíron o acto declarando que malia as represalias con aperturas de expedientes (como os padecidos pola propia Moyano e Jiménez como informou Sermos Galiza) e o menosprezo profesional e a banalización do seu traballo, "nós facemos valer o noso dereito a demandar, como profesionais e como cidadás, unha información de calidade, independente, veraz e plural nos medios públicos”.
As persoas asistentes participaron na tradicional ofrenda floral perante a estatura ‘Ás Ceibes’
Previo ao acto no Jofre, as persoas asistentes participaron na tradicional ofrenda floral perante a estatura ‘Ás Ceibes’ no Cantón de Molíns e que contou coa intervención da xornalista Sabela Direito. A xornada tamén contou co anual Concerto da Liberdade, nesta ocasión a cargo do grupo Petit Swing.
Un ano en negro
Foi o 25 de maio de 2018 cando as traballadores e traballadores da CRTVG comezaron a vestir os venres con camisolas negras, iniciando unhas mobilizacións sen precedentes nos medios públicos galegos que lograron popularizar a denuncia contra a manipulación informativa na compañía pública, o desmantelamento da mesma e a precariedade que dificulta desenvolver o traballo.
O premio José Couso
O premio José Couso honra a memoria deste cámara ferrolán asasinado polos disparos dun tanque estadounidense contra o Hotel Palestina de Bagdad o 8 de abril de 2003, mentres cubría a guerra de Iraq para os informativos de Tele 5.
O premio recoñece a persoas ou organizacións que traballan pola liberdade e contra a manipulación informativa
O Colexio Profesional de Xornalistas de Galiza e o Club de Prensa de Ferrol crearon este premio para recoñecer a persoas ou organizacións que traballan pola liberdade e contra a manipulación informativa, así como para lembrar na figura de José Couso todas aquelas persoas profesionais do xornalismo que cada ano son asasinadas, maltratadas ou privadas dos seus dereitos como persoas e como informadoras.
Defende A Galega sumase así á lista de gañadoras do Premio José Couso de Liberdade de Prensa. Ali Lmrabet (2005); Le Monde Diplomatique (2006); Jon Lee Anderson (2007); José Vidal – Beneyto (2008); Rosa María Calaf (2009); Daniel Anido e Rodolfo Irago (2010); WikiLeaks (2011); o Consejo de Informativos da RTVE (2012); Mónica García Prieto (2013), Ricardo García Vilanova, Javier Espinosa e Marc Marginedas (2014), Jordi Évole (2015), Miguel Ángel Aguilar (2016), Xosé Hermida (2017) e Julia Otero (2018) foron ata agora as galardoadas coa estatuiña das ‘Ás Ceibes’.
