Imprimir

Activistas da Mesa desaloxadas do Pleno de Ourense por pedir a Jácome “respecto” para o galego

Redacción | 04 de novembro de 2019

Un momento da protesta no salón de plenos de Ourense (imaxe: @BNGOUrense)
Un momento da protesta no salón de plenos de Ourense (imaxe: @BNGOUrense)

A MNL reclámalle ao alcalde de Ourense que  "cumpra co seu deber de defensa e promoción do galego” e repróchalle que cando use a lingua propia da Galiza sexa para “desprestixiala”.

 

A Policía Local de Ourense desaloxou na mañá desta segunda feira do Pleno municipal as activistas da Mesa que protestaban pola actitude do alcalde, Pérez Jácome, a respecto do galego.Un grupo de persoas despregaron cartaces co lema “Eu quero o galego” no inicio da sesión plenaria e reivindicaron que Jácome cumpra co estipulado no estatuto de autonomía e Lei de normalización Lingüística a respecto da lingua propia da Galiza.

Nun folleto repartido momentos antes, estas activistas lamentaban que o rexedor ourensán non use o galego nos actos oficiaise cando usa esta lingua sexa para “aldraxala e desprestixiala”. Unha reclamación que apoiaron con lemas e cánticos, o que motivou o desaloxo, que se fixo sen problemas e acompañados por axentes da Policía Local.

Activistas destacan que, en contra do que é habitual, e perante esta protesta, o alcalde iniciou o pleno falando galego. O responsábel da Mesa en Ourense, Manuel Carniceiro, advertiu ao alcalde de que a entidade de defensa da lingua non consentirá a actitude de desprezo ao galego que mantén, e que voltará ao pleno e continuará as protestas mentres o alcalde manteña esa actitude. “O rexeitamento da lingua galega como sinal máis característico de Ourense, unha das principais capitais galegas, é unha mensaxe de autoodio, un exemplo de desprezo polo propio da principal referencia institucional da cidade”.

A Mesa anuncia que voltará todas as veces que cumpra para facer valer as obrigas que ten Xácome cara ao noso principal sinal de identidade. 

 

Podes ver este artigo na próxima dirección /articulo/lingua/activistas-da-mesa-desaloxados-do-pleno-ourense-pedirlle-jacome-respecto-galego/20191104103946086237.html


© 2019 Sermos Galiza