Imprimir

Beatriz Talegón di ter ofertas para as europeas quer de Puigdemont quer da candidatura do BNG

X.M. | 21 de xaneiro de 2019

Beatriz Talegón [Foto: NacióDigital]
Beatriz Talegón [Foto: NacióDigital]

Ex dirixente das mocidades do PSOE, partido que abandonou en 2015, é unha desas raras voces da esquerda española que se teñen pronunciado a prol do desenvolvimento do procés. Para as europeas de maio defende a converxencias das forzas independentistas e republicanas.

Colaboradora de distintos meios —coordena a sección de opinión de Diario 16— Talegón foi fichada por Lluis Llach para facer parte do Consello Asesor para o impulso do Fòrum Cívic i Social per al Debat Constituent, unha entidade que orbita arredor do soberanismo catalán. Nos últimos días, visitou os presos políticos en Lledoners e ten defendido a converxencia das forzas independentistas e republicanas, desde Arnaldo Otegi até Carles Puigdemont pasando por ERC e o BNG.

 

En declaracións a Nació Digital, revelou ter espertado o interese non só de Carles Puigdemont —o ex presidente tería sido o primeiro en sondexar a súa incorporación a unha lista electoral para as europeas—, senón tamén da coalición que preparan EH Bildu, Esquerra Republicana e o BNG.

 

"Síntome moi honrada polo feito de que teñan valorado o meu perfil, quer desde a candidatura que está a plantexar Puigdemont quer desde a coalición ERC, Bildu e BNG", dixo Talegón, quen a seguir esclareceu: "De momento non son máis que convites [a colaborar], e pola miña parte estou a traballar a prol da unidade, para que todas as formacións que defenden o dereito a decidir e as repúblicas se presenten unidas".

 

 

 

Podes ver este artigo na próxima dirección /articulo/internacional/beatriz-talegon-di-ter-ofertas-europeas-quer-puigdemont-quer-da-candidatura-do-bng/20190121125118075374.html


© 2019 Sermos Galiza