Imprimir

ERE de dous anos en Ferroatlántica

X.M.P. | 05 de Febreiro de 2019

Manifestación Ferroatlantica (Foto: GZContrainfo)
Manifestación Ferroatlantica (Foto: GZContrainfo)

A empresa alega perdas económicas nos últimos tres trimestres. O cadro de persoal defende a viabilidade das factorías e denuncia que a empresa “leva tempo intentando xustificar un ERE”. Nos vindeiros días haberá xuntanzas cos alcaldes da comarca e asembleas para preparar a resposta a unha medida que os representantes sindicais entenden inxustificada.

Un Expediente de regulación de emprego (ERE) de dous anos de duración, até 2012. Esta é a proposta que a dirección de Ferroatlántica puxo esta segunda feira sobre a mesa e dirixida a todas as factorías do Estado. O período de negociacións e consultas arranca este 11 de febreiro en Madrid. A dirección alega para aplicar esta medida a existencia de causas obxectivas como, indica, a acumulación de perdas durante os últimos tres trimestres.

 

Porén, estas xustificacións non convencen aos traballadores e traballadoras das factorías galegas. “Levan tempo intentando xustificar estas causas e esta medida”, afirma en conversa con Sermos Galiza, Xabier Santos, da CIG en Cee. “Hai un desvío intencionado de materia prima para as factorías galegas a outras unidades da empresa no Estado español e Francia e para que desde alí sirvan a clientes aos que serviamos nós”, denuncia.

 

Para o sindicalista, o obxectivo do ERE presentado pola dirección é “eliminar” determinadas unidades produtivas entre as que estarían as galegas. Lembra que desde o conflito que mantivo o cadro de persoal e a veciñanza da Costa da Morte contra Ferroatlántica pola intención desta de vender as centrais a situación non se normalizou totalmente. “A empresa mantén o litixio contra a Xunta para que lle deixe vendelas”, indica.

 

Nos vindeiros días os traballadores e traballadoras de Ferroatlántica manterán reunións con alcaldes de concellos da comarca, así como diferentes asembleas e xuntanzas para falar do novo escenario creado polo ERE e posíbeis respostas a dar.

Podes ver este artigo na próxima dirección /articulo/economia/ere-dous-anos-ferroatlantica/20190205113346075744.html


© 2019 Sermos Galiza