Imprimir

Galiza retrocede en innovación nove postos entre as rexións europeas

X.M.P. | 06 de xullo de 2019

Figura de 190 entre os 238 territorios de Europa analizados no ‘Índice de Innovación Rexional’ da Comisión europea. En 2016 situábanos no 181. O norte de Portugal presenta mellores rexistros que o noso país.

 

En competitividade rexional estamos en 2019 na posición 190 entre as 238 rexións de Europa, un posto máis que modesto e que supón un retroceso de 9 lugares a respecto do que tiñamos en 2016 (181) e de 8 sobre o de 2013 (182).

A Comisión Europea publicou o seu ‘Regional Innovation Scoreboard’ (Índice de Innovación Rexional) correspondente a 2019. Un traballo no que se analiza a capacidade e realidade innovadora de 238 rexións e clasifícanse as mesmas en base a 17 indicadores. Desde o emprego ligado a I+D até o número de patentes rexistradas ou de persoas con doutorado, pasando pola análise do tecido empresarial ou mercado laboral. Tendo todos estes dados en conta, fíxanse catro grandes grupos: líderes innovación (aquí están 38 rexións), innovación sólida (73 territorios), innovación moderada (98) e innovación modesta (29 rexións). Cada grupo ten tres subgrupos.

Onde fica Galiza? Pois na parte baixa do grupo de innovación moderada. De feito, se en innovación a media da Unión Europea está en 100 o noso país fica en 55,7 puntos a moita distancia desa media. O informe ofrece dados actualizados sobre a evolución deste índice entre 2011 e 2019. A media europea aumentou 4,7 puntos nestes anos. Ese incremento na Galiza foi de case a metade: 2,5. Moi por debaixo do rexistrado por outros territorios do Estado como Euskadi (8,8 puntos). De feito, o da Galiza foi o sexto peor aumento no conxunto do Estado.

Deses indicadores empregados para esta análise da Comisión Europea, Galiza mellora o nivel europeo e español en canto a ensino superior. Mais ‘pincha’ no resto: está moi por baixo dos rexistros medios no Estado español e Unión Europea en campos como emprego cualificado, gasto empresarial en I+D, ou patentes.

A rexión máis innovadora de Europa é Zúrich (Suiza), seguida de Ticino (Suiza). Helsinki Uusimaa (Finlandia) é a máis innovadora da UE. 

 

Podes ver este artigo na próxima dirección /articulo/economia/galiza-retrocede-innovacion-postos-rexions-europeas/20190704131949081559.html


© 2019 Sermos Galiza