Imprimir

Maduro acusa Trump de tentar provocar fame en Venezuela coa conxelación dos seus activos

X.M. | 07 de agosto de 2019

Maduro, durante a entrevista
Maduro, durante a entrevista
Donald Trump asinou esta segunda feira unha orde executiva para conxelar todos os activos venezuelanos en solo norteamericano. A reacción de Nicolás Maduro foi acusar o presidente norteamericano de intentar provocar a fame masiva no seu país con técnicas de terrorismo económico. O líder chavista estima en máis de 20.000 millóns de dólares o monto dos valores venezuelanos bloqueados nos EUA e en Europa.

Deposta Dilma Rousseff e con Lula na cadea, Venezuela é o principal albo da política latinoamericana da Administración Bush. Após falir en primeira instancia o golpe patrocinado por Washington que pretendía entronizar como novo presidente en Caracas o opositor Juan Guaidó —operación non consumada que contou co apoio do Goberno Sánchez—, Trump aprofunda agora a guerra económica contra o país que posúe as maiores reservas petrolíferas do planeta.

Destarte, esta segunda feira o presidente norteamericano asinou unha orde executiva en virtude da cal conxélanse todos os activos venezuelanos sediados en territorio norteamericano. Eses fondos "están bloqueados e non poden ser transferidos, pagos, exportados, retirados ou tratados de ningunha outra maneira", segundo a norma ditada pola Administración Trump.

O principal activo venezuelano nos EUA é a petroleira Citgo, filial da empresa estatal Petróleos de Venezuela (PDVSA), atinxida xa en xaneiro por sancións impostas polo executivo federal norteamericano. PDVSA é a diana favorita dos ataques de Trump, consciente de que un eventual colapso nas finanzas dese monstro empresarial podería arrastrar na súa caída o goberno de Maduro.

O principal activo venezuelano nos EUA é a petroleira Citgo, filial da empresa estatal Petróleos de Venezuela (PDVSA), atinxida xa en xaneiro por sancións impostas polo executivo federal norteamericano

Nunha entrevista televisiva, o líder chavista cifrou en máis de 20.000 millóns de dólares o volume de fondos conxelados polos EUA e por estados da Unión Europea. E foi alén diso, ao acusar Washington e Londres de perpetrar o "roubo" de 1.400 millóns de dólares en reservas de ouro do Banco Central Venezuelano. "O goberno dos EUA persegue Venezuela para que non poda mercar medicamentos en todo o mundo. Perséguenos para non podermos comprar alimentos, subministracións, produtos básicos, para non podermos comprar nada en todo o mundo", dixo Maduro.

O obxectivo último da guerra económica lanzada polos EUA contra Venezuela sería provocar unha fame masiva no país. Trump fracasará no intento, prognosticou Maduro, quen mostrou a súa confianza nas potencialidades do progarma de distribución de alimentos CLAP (Comité Local de Abastecimento e Produción).

 

 

Podes ver este artigo na próxima dirección /articulo/internacional/maduro-acusa-trump-tentar-provocar-fame-pais-co-roubo-reservas-ouro-venezuelanas/20190807111039082860.html


© 2019 Sermos Galiza