Imprimir

A oposición reclamará de Feixoo un balanzo do seu “decenio negro”

Redacción | 03 de setembro de 2019

As deputadas do BNG Montse Prado (esquerda) e Olalla Rodil na xunta de portavoces do Parlamento de Galiza esta terza feira, 3 de setembro. Foto: BNG.
As deputadas do BNG Montse Prado (esquerda) e Olalla Rodil na xunta de portavoces do Parlamento de Galiza esta terza feira, 3 de setembro. Foto: BNG.
A terceira lexislatura consecutiva con maioría absoluta do Partido Popular encarréirase a termo. É talvez esa certeza a que leva á oposición a reclamar de Núñez Feixoo un balanzo da súa etapa á fronte da Xunta. Farano vindeiro pleno parlamentario, o primeiro do novo curso a vindeira semana, PSdeG e BNG.

Os socialistas estrean condición de segundo grupo da Cámara, despois da escisión de En Marea. E estrean portavoz parlamentario: o secretario xeral do PSdeG, Gonzalo Caballero, intervirá na sesión de control ao presidente por primeira vez. Preguntará polos seus “plans de acción” para o derradeiro ano do actual mandato.

Segundo expuxo esta terza feira Xaquín Fernández Leiceaga, a quen substituirá Caballero, o obxectivo é que “Feixoo aclare que está disposto a mudar” no período que aí vén.

O Bloque tamén orientará a intervención da súa líder Ana Pontón en sentido amplo. Esixe do presidente da Xunta o “balanzo que deixa logo dun decenio negro”. A propia viceportavoz nacionalista Olalla Rodil expuxo a súa opinión na comparecencia de prensa posterior á xunta de portavoces no Hórreo. “É absolutamente negativo”, dixo, antes de se referir á crise que, ao seu xuízo, vive Galiza nos eidos demográfico e industrial.

“A situación actual non se soluciona con propaganda ou manipulación informativa. Feixoo debe responder sobre que fará esta lexislatura, sobre se seguirá lastrando o futuro dos galegos e galegas ou mudará o rumbo das súas políticas”, engadiu.

O rebautizado Grupo Común da Esquerda, antes En Marea, agora con dez escanos despois da marcha de catro deputadas encabezadas por Luís Villares ao grupo mixto, centrará no dereito a vivenda a súa quenda na sesión de control ao presidente. Encargarase dela, segundo o reparto de funcións presentado esta terza feira, Antón Sánchez, quen xa exercera este labor na pasada lexislatura nas fileiras de Alternativa Galega de Esquerda.

Podes ver este artigo na próxima dirección /articulo/politica/oposicion-reclamara-feixoo-balanzo-do-seu-decenio-negro/20190903170243083656.html


© 2019 Sermos Galiza