Até o de agora o Premio Torrente Ballester de Narrativa admitía orixinais en galego e en español, pero en 37 edicións só 7 foran acadados por textos en galego. A Deputación vén de crear dous premios, un en cada lingua.
Adeus ás axudas nominativas, ola á concorrencia competitiva. Goretti Sanmartín vén de presentar as novas liñas de subvencións que fan visíbel un novo modelo de política cultural. Festivais, museos e centros de interpretación, fundacións e entidades de cultura tradicional e popular serán as beneficiarias dun orzamento de 2.250.000 €.
“Territorio expandido” é a exposición de fotografía contemporánea galega, brasileira e portuguesa con que a área de Cultura da Deputación da Coruña inaugurou a Dársena da Coruña como espazo expositivo ao aire libre. O proxecto, ademais da mostra de 37 fotógrafos e fotógrafas, ofrece obradoiros, conferencias e un volume que mostra o encontro das tres culturas a través da imaxe.
A área de Cultura da Deputación e o Teatro Colón preparan conxuntamente unha convocatoria aberta a compañías e artistas para residencias artísticas no Teatro Colón e, como anticipo, presenta o programa DAC_EstadíasColón que leva de xira por distintos concellos da provincia os tres últimos espectáculos que naceron no teatro da Coruña dependente da Deputación.
A nova convocatoria das bolsas de investigación da Deputación da Coruña inclúe, como novidade, a creación de dúas bolsas para a área de estudos de xénero. A iniciativa afonda na liña da área de incentivar a igualdade desde o ámbito da cultura. Outra das novidades é tamén a inclusión da área de planificación sociolingüística da lingua galega na relación de bolsas.
Búscase artista musical, maior de idade e cun proxecto creativo propio. Son as condicións para optar á residencia artística en Irlanda que a área de Cultura da Deputación da Coruña convoca dentro do marco do Proxecto “TOSTA Cultural Cargo”, unha proposta de intercambio cultural que forma parte do programa Donostia-Capital Europea da Cultura 2016.
